(أشرف_ستين_ورقة)
”Skrivboken är ett ansvar som jag bär inför fångarna. Världen måste få veta varje fånges klagan, hur hans fängslade drömmar ser ut, ljudet av hans avbrutna skratt.” PEN/Opp publicerar nyskriven poesi av den unga egyptiska poeten Ahmed el Rodiny. Publiceringen sker i samarbete med Tomorrow Club.
في السجن،
الشُعرا تاريخ الحلم
وأمل منظور من كل طوايف المساجين
وقت ما يتوجعوا بيلاقوا
الوحي بيبدأ في التدوين
تبدأ قصايدهم سرد اللوم
على ذُل الحاكم للمحكوم
يقدر سطر الشعر الواحد
يخلق لون في عيون البوم
يقدر يحكي اليوم فـِ دقيقة
ويقدر يكتب عُمْر فـِ يوم
وانا كان لي هناك وسط الزنازين
شاعر ورفيق
عابر ويّايا صراط الضيق
وزميل زنزانه وحلم طويل وطريق
علمني ازاي اسهر للصبح
دوّب لي الليل فـِ البُن صديق
كان باين من حكاويه
غناويه الفايته حزينه
كان ساكن فيه حبه لبلده
سلبت منه شبابه فـِ شبر شهور
السجن براح
لو بالشعر هناك مشهور
تقدر تتلو على السجّانه آيات الحق
فتصيبهم نشوة
كل السجانه هيؤمنوا بيك
بعد الرشوة
كان شاعر
بيكمل بقصيدته العشوه
وينام ويقول
ويقول وينام
متألِّم كل لغات الآه
متعلِّم كل سمات الله
مؤمن إن الثورة هتحيا
مهما يتوه وطنه هيلقاه
و اِنشَبّ نضاله فَهَبّ معاه
سجنوه
قلبوا يا عالم حلمه كابوس
والسجن يكون السجن ازاي
لو مش جواه شاعر محبوس ؟؟
يقدر حبرُه يعلم كل اجيال هاتنخ
عار النَخ
لغز الفَخ
أصل اللعبه
عشنا هناك أيامنا الصعبه
أضيق سجن فـ مصر كبير
مدةْ حبس
تقدر تقنع فيها الريح
إن جناحه ما عادش يطير
سجن النور في حيطانه أسير
كل خطاوي بأمر المخبر
تاكل تشرب تضحك تنعس
لازم تِدّي جنابُه تمام
قال الله
قصدي الظابط
لو هاتصلي ؟
لازم المخبر يبقى إمام
واما تنام ؟
يبقى مراقب للأحلام
صاحبي الشاعر
شوفت فـْ بطن سطورُه معان
كل حكاوي عن المساجين
كل سنين ظلم السجان
عِلّه وحلم
ذِلّه وظلم
وفي ليلة نوَّه فـْ فصل الشتا
حِلِم الحاكم يسلب منّا الدفا م الغَطا
بس عرفنا بدستةْ تبغ
إمتى هييجي لينا التفتيش
طول ما الرشوه فـْ مصر بخير
تفضل مصر بخير وتعيش
جَه التفتيش
مِيتْ مسجون حاشدين علشانهم ألف شاويش؟؟
هاتك جرد
سلخوا جلود الدفا مِ البرد
خدوا كل ما ينفع ينفع
صاحبي الشاعر ؟
كان متطمن ع الكشكول
واما سألتُه بدأ القول
إنه فـْ وقت الفُسحه امبارح
سَهَّى المُخبر
دفنه فـ كيس من تحت الشجره
أصل المكتوب جواه من شعر
شرحُه يطول
فيه كل أسامي القُتَلَهْ
واسم المسؤل
فيه في الكشكول
أحزان وعياط
وتروس إحباط
كل أسامي الظباط علشان يسردها الشعر تاريخ
لكتب دراسات إبتدائيه
مكتوب بالشعر
دوا واحد لـ امراض الدنيا
حكومتنا الأولى على العالم
الدوا عندها ينفع لألآف
لو عندك برد؟
خد حبه ونام
لو عندك رد؟
خد ضربه وخاف
صاحبي الشاعر
خبى الكشكول تحت الشجره ووصّاني عليه
مش عارف ليه انا وصّاني لكن وصّى
بصّ لي بَصّه وقالي الكشكول
دي أمانه في رقبتي للمساجين
لازم العالم يعرف كل أنين مسجون
نوع أحلامه المأسوره
شكل الضحكه المبتوره
لازم الظابط يفهم إنه بدون الطلقه يدوب دبوره
لازم تظهر مصر حقيقه
مصر حقيقه مجرد صوره
عَبّى تاريخ السجن في شِعرُه
دوِّن جوع و اوجاع
ضيع و ضياع
شعبنا كبش اتلموا ما فوقهُ وحوش وضباع
جوا السجن سباع و أُسود
عود الأحرار المحسود
سجّل في الكشكول أحلامنا
عيّن بالأشعار حُكامنا
خلّى الدين لله وللأرض
خلّى الله مش هوَّ الظابط
وزع جنه لكل فقير
جَوِّز بنت الحاكم لِابن المدعو وظيفته خفير
فسَّر كل مواد دستور
من سنوات مالهاش تفسير
جَمَّع كل حبيب بحبيبه
رَجَّع مصر لقيمةْ طيبه
خلّى النيل منبعه دمياط
لاجل ماتعطش أبداً مصر
ولاجل ماتطمَعش الشَرّيبه
خَدْ أسماء كل المساجين
عَدّ ألآم كل الزنازين
سَجّل كل ما كان يستجِّل
آمن إن الشعر بيُمِهِل مش بيأجِّل
وقت حساب عرابيد الحكم
باعوا و ضيعنا
شبعوا و جوعنا
راحوا رجعنا
ثورنا فقاموا وسرقوا ربيعنا
بعد ما عدى الليل في اليوم دا
طل الصبح
صدر الليل راشق فيه رمح
بصيت ع الشاعر
مالقتهوش
فين الشاعر؟؟
رد رفاقتي عليا ..زياره
كان مشتاق لاخواته وأهله
كان يتنشق جوّا السجن
تيجي زياره فـ يوم تندهله
قولت أروح الشجره اياها
ألحق اجيب كشكولنا اياه
تحت يمين الشجرة التوت
في الكشكول
كل أنين مسجون كانت ساكت
كل صراخ مسجون فـِ سكوت
واما وصلت بدأت الحَفر
والوقت يطول
ومالقتهوش
والرجفه تصيب قلبي المحزون
دوَّرت هناك انا ع الكشكول
وما كانش هناك راح فين هايكون
مالقِتش هناك غير شاعر لكن
كان مدفون
فاحلِفت اكون صادق في القول
أنا هاجي السجن لحد ما اموت
لو هاخرج؟
هارجع على طول
مش لاجل اني اتعلمت الشعر
لأ .
أنا هاجي أزور صاحبي المقتول
ــــــ
